ਕਿੱਦਾਂ ਦਰਦ ਦਾ ਹਾਣੀ ਬਣ ਜਾਂ,ਕਿੱਦਾਂ ਪੀੜ ਜਵਾਨ ਕਰਾਂ?!
ਕਿੱਦਾਂ ਸੋਗ ਨੂੰ ਅਰਘ ਚੜ੍ਹਾਵਾਂ ,ਹੱਡੀਆਂ ਦੀ ਮੁਠ ਦਾਨ ਕਰਾਂ?!
ਕਿੱਦਾਂ ਬਿਰਹੋਂ ਸੰਗ ਮੈਂ ਲਾਂਵਾਂ ਲੈ ਕੇ ਲਾੜਾ ਬਣ ਜਾਂਵਾਂ ;
ਕਿੱਦਾਂ ਚੀਸਾਂ ,ਹੌਕੇ ਹਾਵੇ ਜਾਂਜੀਆਂ ਦਾ ਸਨਮਾਣ ਕਰਾਂ ?!
ਉਮਰਾਂ ਵਾਲਾ ਬਾਲਣ ਪਾ ਪਾ ਇਸ਼ਕ ਤੰਦੂਰੀ ਤੌਣੀ ਸੀ ;
ਪਰ ਅਥਰਾਂ ਸੰਗ ਬਾਲਣ ਸਿੱਲ੍ਹਾ ,ਕਿੱਦਾਂ ਕੀ ਨਾਦਾਨ ਕਰਾਂ?!
ਦਰਦ ਵਰਕਿਆਂ ਉੱਤੇ ਪੀੜ ਦੀ ਪੀੜੀ ਰੱਤ ਉਲੀਕਾਂ ਕਿੰਜ ?
ਕਿੰਜ ਮਹਿਰਮ ਨੂੰ ਦਰਦ ਸੁਣਾਵਾਂ ,ਕਿੱਦਾਂ ਹਾਲ ਬਿਆਨ ਕਰਾਂ?!
ਜੇਕਰ ਗਜਲ ਬਗੀਚੀ ਵਾਲੇ ਸੁੰਦਰ ਫੁੱਲ-ਫਲ ਚੁਣ ਸਕਦਾ ;
ਦਿਲ ਨੂੰ ਆਹਰੇ ਲਾਂਵਾ ,ਫਿਰ ਕਿਓਂ ਆਪਣਾ ਦਰਦ ਬਖਾਨ ਕਰਾਂ .
ਲੋਕ ਮੁਹੱਬਤ ਦੇ ਵੈਰੀ ਯੁਗ ਯੁਗ ਤੋਂ ਹੁੰਦੇ ਆਏ ਨੇ ;
ਕਿੱਦਾਂ ਉਲਫਤ ਦੀਪ ਜਗਾਵਾਂ ਰੌਸ਼ਨ ਕੁੱਲ ਜਹਾਨ ਕਰਾਂ?!
-ਦੀਪ ਜੀਰਵੀ -9815524600
http://www.facebook.com/deep.zirvi.5
No comments:
Post a Comment