...ਮੋਇਆਂ ਪੁਛਣਾ ਏਂ[ਦੀਪ ਜ਼ੀਰਵੀ}

...ਮੋਇਆਂ ਪੁਛਣਾ ਏਂ

ਸਲੇਟੀ ਸਿਆਹ ਸਫੇਦ ਕਰੋ.....ਮੋਇਆਂ ਪੁਛਣਾ ਏਂ
ਆਪਣੀ ਬੇੜੀ ਛੇਦ ਕਰੋ ...ਮੋਇਆਂ ਪੁਛਣਾ ਏਂ.

ਆਪਣੇ ਪੁੱਤ ਭਤੀਜ ਤੇ ਜੀਜੇ ਪਾਲੀ  ਜਾਵੋ ;
ਕੁਨਬਾ ਪਰਵਰੀ ਤੇਜ਼ ਕਰੋ ...ਮੋਇਆਂ ਪੁਛਣਾ ਏਂ.

ਡੂੰਘੇ ਬੋਰਵੇਲ ਚ ਡਿੱਗਿਆ ਸਹਿਕੇ ਬੰਦਾ .
ਚਲੋ ਓਸੇ ਨਾਲ ਚਹੇਡ ਕਰੋ ...ਮੋਇਆਂ ਪੁਛਣਾ ਏਂ.

ਆਪਣੀ ਮਾਂ-ਬੋਲੀ ਨੂੰ ਦਫਤਰੋਂ ਬਾਹਰ ਕਰ ਕੇ ;
ਓਪਰੀਆਂ ਦਾ ਹੇਜ ਕਰੋ ...ਮੋਇਆਂ ਪੁਛਣਾ ਏਂ.

'ਸਾਲੂ' ,'ਸੁੱਬਰ','ਫੁਲਕਾਰੀ' ਨੂੰ ਕਿੱਲੀ ਟੰਗੋ ;
ਚੁੰਨੀ ਦਾ ਪਰਹੇਜ਼ ਕਰੋ ...ਮੋਇਆਂ ਪੁਛਣਾ ਏਂ.

ਚਿੰਤਨ ਵਾਲੀ ਬਾਰੀ ਘੁੱਟ ਕੇ ਭੇੜ ਦਿਓ ,ਫਿਰ ;
ਫੋਕੀ ਚਿੰਤਾ ਤੇਜ਼ ਕਰੋ ...ਮੋਇਆਂ ਪੁਛਣਾ ਏਂ.

ਸਾਹਵਾਂ ਦੀ ਆਵਾ ਗਵਣ ਨੂੰ ਆਖੀ ਜਾਵੋ ਜਿਓਣਾ ;
ਤੇ 'ਜੀਵਨ ' ਤੋਂ ਪਰਹੇਜ਼ ਕਰੋ ...ਮੋਇਆਂ ਪੁਛਣਾ ਏਂ.

ਹਿੰਮਤ ,ਹੌਂਸਲਾ ਜੀ-ਦਾਰੀ ,ਤੇ ਰੂਹ ਦੇ ਨਾ ਤੇ ;
ਕਤਲ ਧਮਾਕਾ -ਖੇਜ਼ ਕਰੋ ...ਮੋਇਆਂ ਪੁਛਣਾ ਏਂ.

ਸੁੰਦਰਾਂ,ਮੁੰਦਰਾਂ ,ਪੂਰਨ ,ਇਛਰਾਂ ਜਾਂ ਫਿਰ ਗੋਰਖ ;
ਕਿਸੇ ਦਾ ਵੀ ਨਾ ਹੇਜ ਕਰੋ ...ਮੋਇਆਂ ਪੁਛਣਾ ਏਂ.

ਹੋਲੀ ,ਈਦ ਕ੍ਰਿਸਮਿਸ ਦੀਵਾਲੀਂ,ਗੁਰ੍ਪੁਰ੍ਬੀੰ;
ਕਰੋ ਉਜਾੜਾ ਤੇਜ ਕਰੋ ...ਮੋਇਆਂ ਪੁਛਣਾ ਏਂ.

ਨਾਨਕ ਦੇ ਦਸ ਜਾਮੇ ਆਣ ਸੁਮੱਤ ਬਖਸ਼ ਗਏ ;
ਮਨ ਮੱਤੀਆਂ ਬੇਸ਼ੱਕ ਤੇਜ ਕਰੋ ...ਮੋਇਆਂ ਪੁਛਣਾ ਏਂ.

ਪਹਿਲਾਂ ਕੁਦਰਤ- ਰਾਣੀ ਦੀ ਪੱਤ ਲੁੱਟੋ ਹਥੀਂ ;
ਫਿਰ ਕੰਡਿਆਂ ਦੀ ਸੇਜ ਕਰੋ ..ਮੋਈਆਂ ਪੁਛਣਾ ਏਂ.


--
ਦੀਪ ਜ਼ੀਰਵੀ
9815524600
http://chitravli.blogspot.com/

http://www.facebook.com/deep.zirvi.5