ਰੋਂਦੇ ਨੂੰ ਤਾਂ ਹੋਰ ਵੀ ਲੋਕ ਰੁਆਂਦੇ ਨੇDEEP ZIRVI9815524600

'ਬੁੱਕਲ ਦੇ ਸੱਪ' ਯਾਰ ਜਦੋਂ ਬਣ ਜਾਂਦੇ ਨੇ;

ਕਹਿਰਾਂ ਨਾਲੋਂ ਕਹਿਰੀ ,ਕਹਿਰ ਕਮਾਂਦੇ ਨੇ।

-0-

ਵਣਜ-ਵਿਹਾਰ ਦਾ ਛਿੱਕੂ ਸੱਖਣਾ ਹੋਇਆਂ ਬਈ;

ਦਿਲ ਵੱਟੇ ਹੁਣ ਕੱਚ ਵੀ ਨਹੀਂ ਪਾਂਦੇ ਨੇ ।

-0-

ਨਿੱਤ ਗਲੇਡੂ ਕੇਰੀ ਜਾਹ ਕਿਸੇ ਤੱਕਣਾ ਨਹੀਂ;

ਰੋਂਦੇ ਨੂੰ ਤਾਂ ਹੋਰ ਵੀ ਲੋਕ ਰੁਆਂਦੇ ਨੇ।

-0-

ਬੁੱਕਲ ਦੇ ਵਿੱਚ ਮੂੰਹ ਲੈ ਲੈ ਕੇ ਰੋਈ ਜਾ;

ਲੋਚੀਂ ਨਾ ਕਿ ਸੱਜਣ ਮੋਢੀਂ ਲਾਂਦੇ ਨੇ।

-0-

'ਰਾਂਗਲੇ ਸੁਫਨੇ' ਹੱਥ ਪੀਲੇ ਕਰ ਦੂਰ ਗਏ ;

ਹੁਣ ਆਹ ਮੇਰੇ ਦੀਦੜੇ ਖਾਲੀ ਭਾਂਡੇ ਨੇ।

-0-

ਰਸਭਰਿਆ ਤੇ ਪੋਨਾ ਕਿਤੇ ਕਮਾਦ ਨਹੀਂ;

ਹੁਣ ਤਾਂ ਚਾਰ-ਚੁਫੇਰੇ ਸੁੱਕੇ ਟਾਂਡੇ ਨੇ।

-0-

ਵੇਖ ਵਗੀ ਵਾਅ ਕੇਹੀ ਚੰਦਰੀ ਚਾਂਭਲੀ ਏਹ;

ਕਿਧਰੇ ਅੱਜਕਲ ਕੁੜ-ਕੁੜ ਕਿਧਰੇ ਆਂਡੇ ਨੇ।

-0-

ਤਾੜੀ ਮਾਰਦੇ ਹੱਸਦੇ ,ਕਿਸੇ ਦੇ ਡਿੱਗੇ ਤੋਂ;

ਸੱਟ ਕਿਤੇ ਨਹੀਂ ਲੱਗੀ?:ਹੁਣ ਕਦ ਆਂਹਦੇ ਨੇ

-0-

ਦੀਪ ਜ਼ੀਰਵੀ