ਉੱਡਦੇ ਵੇਖੇ ਮੈਂ ਪਰਖਚੇ ਫੁਕਰੇ ਨੁਕਰੇ ਮਜਨੂਆਂ ਦੇ ;[ਗਜ਼ਲ },

 ਇੱਕ ਦੂਜੇ ਦੇ ਆਹਮੋਂ ਸਾਹਵੇਂ ਹੁੰਦੇ ਅਕਸਰ ਮੈਂ ਤੇ ਮੈਂ ;

ਕਦੀਂ  ਕਦਾਈਂ  ਓਹ ਤੇ ਓਹ ਵੀ ਆਹਮੋਂ ਸਾਹਵੇਂ ਹੋ ਜਾਂਦੇ .

ਕੋਲੇ ਕੋਲੇ ਹੁੰਦੇ ਚਾਹੇ  ਕੋਹਾਂ ਦੀ ਵਿਥ ਤੇ ਹੁੰਦੇ ,

ਇੱਕ ਮਿੱਕ ਹੁੰਦੇ ਇੱਕ ਮਿੱਕ ਰਹਿੰਦੇ ਕਦੀ ਨਹੀਂ ਹੋ ਦੋ ਪਾਂਦੇ.

ਓੜਕ ਆਖਿਰ,ਆਖਿਰ ਓੜਕ ;ਇਸ਼ਕ ਖੁਦਾ ਸੀ ,ਇਸ਼ਕ ਖੁਦਾ ਹੈ ;

ਓਹੀ ਪਾਂਧੀ ਵਾਟ ਮੁਕਾਵਣ;ਇਸ਼ਕ ਦੀ ਰਾਹੇ ਜੋ ਜਾਂਦੇ .

 ਉੱਡਦੇ ਵੇਖੇ ਮੈਂ ਪਰਖਚੇ ਫੁਕਰੇ ਨੁਕਰੇ ਮਜਨੂਆਂ ਦੇ ;

ਸੁੱਚੇ ਆਸ਼ਿਕ ਪਾਉਣ ਨਾ ਰੌਲਾ ;ਓਹ ਤੇ ਚੁੱਪ ਹੀ ਹੋ ਜਾਂਦੇ .

ਮੈਂ ਤੇ ਓਹ ਦੋ ਕਦੇ ਨਹੀਂ ਸੀ ,ਨਾ ਹਾਂ ,ਨਾ ਕਦੀ ਹੋਣਾ ਹੈ  ;

ਸਾਹਵਾਂ ਵਿੱਚ ਰਲ ਓਹ ਆਓਂਦੇ ਨੇ, ਸਾਹਵਾਂ ਸੰਗ ਨੇ ਓਹ ਜਾਂਦੇ .

ਰਗ ਰਗ ਦੇ ਵਿੱਚ ਲਹੂ ਨਹੀਂ ਹੈ ਇਸ਼ਕ ਹੀ ਫੇਰੇ ਲਾਉਂਦਾ ਹੈ ;

ਇਸ਼ਕ ਵਿਛਾਉਣਾ,ਓੜਨ ਪਹਿਰਨ,ਇਸ਼ਕ ਦੇ ਡੇਰੇ ਜੋ ਜਾਂਦੇ 

ਇਸ਼ਕ ਹੜੇ, ਨਾ  ਸੜੇ ਇਸ਼ਕ ;ਹਾਂ, ਦੇਹਾਂ ਮਿੱਟੀ ਹੋ ਜਾਵਣ ;

ਓਹ ਮਰ ਕੇ ਵੀ ਮੁੱਕਦੇ ਨਹੀਓ ,ਇਸ਼ਕ ਜਮਾਤਾਂ ਜੋ ਲਾਂਦੇ .

 ਦੀਪ ਜ਼ੀਰਵੀ

http://www.facebook.com/deep.zirvi.5