"ਬੁਧੂ " ਤੇਰਾ, ਤੇਰਾ "ਬੁਧੂ ";ਤੇਰਾ ਸੀ ਤੇਰਾ ਹੈ ਯਾਰ .

 ਧੀਰਜ , ਧਰਮ  ਯਾਰ ਤੇ ਪਿਆਰ ,ਔਖੇ ਵੇਲੇ ਦੇ ਹਥਿਆਰ .

ਬੰਸਰੀ ,ਸ਼ਹਨਾਈ ਤੇ ਗੀਤ ;ਸਰਗਮ ਬਾਝੋਂ ਸਭ ਬੇਕਾਰ .

ਚੰਦਨ ਤੂੰ ਬੇਸ਼ੱਕ ਸਵੀਕਾਰ ,ਮੈਂ ਵੰਝਲੀ ਦਾ ਵੰਝ ਹਾਂ ਯਾਰ ;

ਬਿਹਬਲ ਤੇਰੇ ਮੇਲੇ ਨੂੰ ਹੈ ,ਤਨ-ਤੰਬੂਰਾ ਤੇ ਮਨ-ਤਾਰ .

ਤੇਰੇ ਬਾਝੋਂ ਮੈਂ ਕੁਝ ਨਹੀਓਂ ,ਲੱਗਦਾ ਤੈਨੂੰ ਝੂਠ ਹੈ ਯਾਰ .

ਗਜਲ ਨਜ਼ਮ ਦੋਹਾ ਕਿ ਸੋਰਠਾ ,ਜੋ ਚਾਹਵੇਂ ਕਰ ਮੈਨੂੰ ਯਾਰ ,

ਸਾਹ ਸਤ ਹੀਣਾ ਦੇਹ ਦਾ ਪਿੰਜਰਾ ,ਰੂਹ ਤੇਰੇ ਸੰਗ ਵਿਚਰੇ ਯਾਰ .

ਤੇਰੀ ਮੰਨੀ ਮੰਨੂੰ ਤੇਰੀ ,ਤੂੰ ਤੂੰ ਤੂੰ ਤੂੰ ਤੂੰ ਹੀ ਯਾਰ .

ਸ਼ਾਇਰੋ ਆਸ਼ਿਕ ਤੂੰ ਹੀ ਕੀਤਾ ,ਤੂੰ ਹੀ ਸਿਖ੍ਲਾਇਆ ਹੈ ਪਿਆਰ .

ਤੈਨੂੰ ਹਾਕ ਵੀ ਮਾਰੂੰ ਨਾ ਹੁਣ ,ਇੱਕ ਪਲ ਭੁੱਲੂ ਵੀ ਨਾ ਯਾਰ .

ਮੇਰੇ ਤਨ-ਮਨ ਸੋਚ ਮੇਰੀ ਤੇ ,ਤੂੰ ਜਾਣੇ ਤੇਰਾ ਅਧਿਕਾਰ ;

ਵਹਿਮ ਵਹਿਮ ਵਿੱਚ ਅਕਸਰ ਬੰਦਾ ,ਕਰ ਬਹਿੰਦਾ ਜੀਵਨ ਬੇਜ਼ਾਰ .

ਜੋ ਜੋ ਤੈਨੂੰ ਪਿਆਰ ਹੈ ਕਰਦਾ ,ਉਸ ਉਸ ਨੂੰ ਮੈਂ ਕਰਦਾ ਪਿਆਰ .

ਜੋ ਜੋ ਤੇਰੇ ਪਿਆਰ ਦਾ ਪਾਤਰ ,ਉਸ ਉਸ ਨੂੰ ਮੇਰਾ ਸਤਿਕਾਰ .

ਮੇਰੇ ਕੋਲੇ ਹੋਰ ਤੇ ਕੁਝ ਨਾਂ ,ਪਿਆਰ ਪਿਆਰ ਹੈ ਸਿਰਫ ਹੈ ਪਿਆਰ .

ਤੈਨੂੰ ਮੈਨੂੰ ਜਿਸ ਨੇ ਬੰਨਿਆਂ ,ਅਨਦਿਸਦੀ ਓਹ ਪਿਆਰ ਦੀ ਤਾਰ .

ਜਿਸ ਨੂੰ ਝੂਠ ਨੇ ਡੰਗਿਆ ਉਸਨੂੰ  ,ਸਚ ਵੀ ਕੂੜ ਹੈ ਭਾਸਦਾ ਯਾਰ .

"ਬੁਧੂ " ਤੇਰਾ, ਤੇਰਾ "ਬੁਧੂ ";ਤੇਰਾ ਸੀ ਤੇਰਾ ਹੈ ਯਾਰ .

ਦੀਪ੍ਜੀਰਵੀ