ਉਹ ਜੋ ਇਸ਼ਕ਼ ਦਾ ਆਸ਼ਿਕ਼ ਹੈ ਖੁਦ ਇਸ਼ਕ਼ ਹੈ ਜੋ...

ਮਿਰਗ ਕਥੂਰੀ ਵਾਂਗਰ ਵਣ  ਵਣ ਭੌਂਦੇ ਨੂੰ ,

ਉਮਰਾਂ ਹੋਈਆਂ ਇੱਕ ਛਿਨ ਵਾਂਗਰ ਲੱਗਦਾ ਏ ;

ਕਿਸੇ ਬਨਾਰਸੀ ਠੱਗ ਜਿਹਾ ਇਹ ਦਿਲ ਚੰਦਰਾ ,

ਤੇਰਾ ਹੋਇਆਂ ਮੈਨੂੰ ਹੀ ਪਿਆ ਠੱਗਦਾ ਏ .

ਗੇਰੂਏ ਲੀੜੇ ਗਲ ਵਿੱਚ ਨਾਲੇ ਕੰਨ ਪਾਟੇ,

ਅਲਖ ਨਿਰੰਜਨ ਦਰ ਦਰ ਅਲਖ ਜਗਾਵੇ ਜੋ ;

ਸੁੰਦਰਾਂ ਦੇ ਵੱਲ ਕੰਡ ਕਰ ਤੁਰਿਆ ਜੋ ਜੋਗੀ ,

ਆਪਣੇ ਮਨ ਦੀ ਜੋਗਣ ਜੋਗਾ ਲੱਗਦਾ ਏ .

ਸੂਖਮ ਭਾਵਨਾ ਸੂਖਮ ਭਾਵੀ ਜਾਣ ਸਕੇ ,

'ਸੁੱਕੇ ਦੀਦਿਆਂ ਦੇ ਅਥਰ ' ਪਹਚਾਨ ਸਕੇ ;

ਅੰਨੇ ਬੋਲੇ ਅੱਗੇ ਦੀਦੇ ਗਾਲ ਲਵੋ ,

ਰੋਵੋ ਰੱਜ ਰੱਜ ਐਪਰ ਕਿਹੜੇ ਹੱਜ ਦਾ ਏ .

ਦੇਹੀ ਸਾਜ਼ ਤੇ ਦੇਹੀ ਨਾਦ ਨੂੰ ਪਿਆਰ  ਕਹੋ,

ਮਤਲਬ ਮਾਰਿਓ ਕੁਝ ਤਾਂ ਉਸ ਦਾ ਖੌਫ਼ ਕਰੋ ;

ਉਹ ਜੋ ਇਸ਼ਕ਼ ਦਾ ਆਸ਼ਿਕ਼ ਹੈ ਖੁਦ ਇਸ਼ਕ਼ ਹੈ ਜੋ ,

 ਉਹ ਜੋ ਸਭ ਦੇ ਲੂੰ ਲੂੰ ਅੰਦਰ ਵੱਸਦਾ ਏ .

ਮੰਗ ਸਿੰਧੂਰੀ ਜਿਸ ਕੀਤੀ ਦੇਹ ਓਸੇ ਦੀ ,

ਦਿਲ  ਚੰਦਰਾ ਜੋ ਰਾਂਝੇ ਦਾ ਸੀ, ਹੈ,ਰਹਿ ਸੀ ;

ਹੀਰ ਕੁਪੇਚੇ ਵਲੀ ਖੜੀ ਸੋਚੇ ਸਾਹ-ਸਾਹ ,

 ਕਿਧਰ ਜਾਵੇ ਇਸਦਾ ਪਤਾ ਨਾ ਲੱਗਦਾ ਏ .

ਅੱਥਰੇ ਬਾਲ-ਨਿਆਣੇ ਵਰਗੇ ਜ਼ਿੱਦੀ ਨੇ ,

ਤਨ ਵੀ, ਮਨ ਵੀ, ਭਾਵਨਾ ਵੀ ਤੇ ਉਲਫਤ ਵੀ ;

ਅੱਗੋਂ ਸੂਹਾ ਕੋਲਾ ਏ ਕਿ ਲਾਲ ਕੋਈ ,

ਭੋਲੇ ਬਾਲਾਂ ਨੂੰ ਤੇ  ਪਤਾ ਨਾ ਲੱਗਦਾ ਏ .

ਵਿੱਚ ਕਿਤਾਬਾਂ ਜਾਂ ਫਿਰ ਖਵਾਬਾਂ ਤੱਕੇ ਨੇ ,

ਉਲਫਤ ਵਾਲੇ ਕਿੱਸੇ ਮਿੱਠੇ ਮਿੱਠੇ ਜੋ ;

ਪੂਰੀ ਦੇਹੀ ਸੂਤ ਸੂਤ ਕਰ ਬਲਦੀ ਏ ,

ਅਗਨੀਂ ਦਾ ਪਰ ਨਾ ਸਰਨਾਵਾਂ ਲਭਦਾ ਏ .

ਦੀਪ ਜ਼ੀਰਵੀ 

9815524600