ਚੇਤੇ ਦੀ ਚੰਗੇਰ 'ਚ ਥਾਂ ਚੰਗੀ ਹੈ ਪੱਟੀ ਦੀ

ਚੇਤੇ ਦੀ ਚੰਗੇਰ 'ਚ ਥਾਂ ਚੰਗੀ ਹੈ ਪੱਟੀ ਦੀ 
ਨਾਨਕਿਆਂ ਦਾ ਪਿੰਡ ਭਲਾ ਤਾਂ ਲੱਗੂ  ਗਾ ਮੁਲਕਾ .
-੦-
ਬਚਪਨ ਅਤੇ ਨਾਨਕੇ ਪਿਆਰੇ ਪਿਆਰੇ ਦੋਵੇ ਹੀ
ਵਾਹ ਬਚਪਨ ਅਨਭੋਲ ਭਲਾ ਤਾਂ ਲੱਗੂ ਗਾ ਮੁਲਕਾ.
-੦-
ਟੇਸ਼ਨ-ਪਾਰ੍ਲੇ ਰੇਲਵੇ ਪਾਰਕ ਦੋਪੇਹਿਰੇ ਜਾਣਾ ,
ਧੁੱਪ ਚ ਲੂਸੇ ਝੂਲਿਆਂ ਦੇ ਵਿੱਚ ਜਾ ਕੇ ਬਹਿ ਜਾਣਾ
-੦-
ਖਾਣੀਆਂ ਝਿੜਕਾਂ ਨਾਨੀਂ ਕੋਲੋਂ ਇੱਲਤਾਂ ਕਰਦਿਆਂ ਨੇ ,
ਝਿੜਕਾਂ ਖਾ ਛਹਿ ਕੇ ਬਹਿ ਜਾਣਾ ਡਰਦਿਆਂ ਡਰਦਿਆਂ ਨੇ .
-੦-
 ਡਾਂਗਾ  ਵਰਗੇ ਰਸ ਲਿਓਣੇ ਮਾਮੇ ਸੱਤੇ ਤੋਂ ,
ਫੁੱਲੀਆਂ ਅਤੇ ਖਤਾਈਆਂ ਕੋਲੇ ਸਭ ਕੁਝ ਰਖਦਾ ਜੋ .
-੦-
ਲੌਢੇ ਵੇਲੇ ਰੇਹੜੀ ਵਾਲੇ ਚੰਨੀ ਨੇ ਆਓਣਾ ,
ਨਿੱਕੀ, ਮੁੰਨਾ ,ਰੋਮੀ ,ਗੋਲਡੀ ਸਭਨਾਂ ਨੂੰ ਭਾਉਣਾ .
-੦-

ਪੌਲੀ-ਧੇਲੀ ਲੈ ਲੈਣੀ ਤਦ ਮਾਂ ਜਾਂ ਮਾਸੀ ਤੋਂ ,
ਅੱਜ ਦਾ ਕੋਟ ਖਜਾਨਾ ਵੀ ,ਤੁਛ੍ਹ ਹੈ ਉਸ ਰਾਸ਼ੀ ਤੋਂ .
-੦-
ਫਿਕਰਾਂ ਵਾਲੇ ਗੱਡੇ ਕੋਹਾਂ ਦੂਰ ਹੀ ਰਹਿੰਦੇ ਸੀ ,
ਉਸ ਵੇਲੇ ਜਦ ਸਾਰੇ ਬਿੱਟੂ ਬਿੱਟੂ ਕਹਿੰਦੇ ਸੀ .

-੦-
ਚੰਚਲ ਚਿਤਵਨ ਅਖਾਂ ਬਿੱਲੀਆਂ ਕੁਦਰਤ ਕਾਦਰ ਦੀ ,
ਕਵਿਤਾ ਓਦੋਂ ਵੀ ਹਾਜਰ ਸੀ ,ਮੈਂ ਹੀ ਨਾ ਹਾਜ਼ਿਰ ਸੀ
-੦-
ਹੁਣ ਜਦ ਨਾਨਕੇ ਤੇ ਬਚਪਨ ਉਹ ਚੇਤੇ ਆਓਂਦਾ ਹੈ ,
ਮੇਰੇ ਲੂੰ ਲੂੰ ਤਾਈ ਮੁਲਕਾ ਉਹ ਨਸ਼ਿਆਓਂਦਾ  ਹੈ.
-੦-
ਦੀਪ੍ਜੀਰਵੀ
੨੭-੯-੧੧