ਤੁਸੀਂ ਕੋਲ ਮੇਰੇ ਆਵੋਗੇ ਕਿਸੇ ਦਿਨ।
ਦਿਲ ਦੀ ਲਗੀ ਬੁਝਾਵੋਗੇ ਕਿਸੇ ਦਿਨ।
ਕਿਸੇ ਦਿਨ ਹੋ ਸਕੇਗੀ ਈਦ ਮੇਰੀ,
ਤੁਸੀਂ ਸੂਰਤ ਦਿਖਾਵੋਗੇ ਕਿਸੇ ਦਿਨ।
ਕਿਸੇ ਦਿਨ ਜੁਲਫ਼ਾਂ ਦੀ ਛਾਵੇਂ ਸੱਜਣ ਜੀ,
ਤਪੇ ਦਿਲ ਨੂੰ ਬਿਠਾਵੋਗੇ ਕਿਸੇ ਦਿਨ।
ਅਸੀਂ ਰੁੱਸਾਂਗੇ ਝੂਠੀ ਮੂਠੀ ਤੇ ਫਿਰ,
ਅਸਾਂ ਨੂੰ ਆ ਮਨਾਵੋਗੇ ਕਿਸੇ ਦਿਨ।
ਜੀ ਆਪਣੀ ਨਰਮ ਨਾਜ਼ੁਕ ਛਾਂ ਸਹਾਰੇ,
ਮੇਰੇ ਸੁਫ਼ਨੇ ਸਜਾਵੋਗੇ ਕਿਸੇ ਦਿਨ।
ਤੁਸੀਂ ਆਪਣੀ ਮੁਹੱਬਤ ਦਾ ਜੀ ਭਰਕੇ,
ਕੋਈ ਪਿਆਲਾ ਪਿਲਾਵੋਗੇ ਕਿਸੇ ਦਿਨ।
ਅਸਾਡੀ 'ਸੋਚ ਦੇ ਵਿਹੜੇ' ਰਹੇ ਹੋ,
ਅਸਾਡੇ ਵਿਹੜੇ ਆਵੋਗੇ ਕਿਸੇ ਦਿਨ।
ਤੁਸੀਂ ਮੁਨਸਿਫ਼ ਹੋ ਕੀ ਇਨਸਾਫ ਥੋਡਾ,
ਅਸਾਨੂੰ ਕਰ ਵਿਖਾਵੋਗੇ ਕਿਸੇ ਦਿਨ।
ਸ਼ਰਬਤੀ ਨੈਣ ਦੋ ਛਲਕਣ ਪਿਆਲੇ,
ਮਿਰੇ ਨੈਣੀ ਰਲਾਵੋਗੇ ਕਿਸੇ ਦਿਨ।
ਮੁਹੱਬਤ ਹੈ ਜੋ ਇੱਕ ਕੋਹਿਨੂਰ ਹੀਰਾ,
ਅਸਾਡੀ ਝੋਲ ਪਾਵੋਗੇ ਕਿਸੇ ਦਿਨ।
ਅਸਾਡੇ ਸੱਚ ਨੂੰ ਕੱਚ ਜਾਣਿਆ ਕਿਉਂ,
ਖਤਾ ਮੇਰੀ ਬਤਾਵੋਗੇ ਕਿਸੇ ਦਿਨ।
ਟਿਮਕਦਾ 'ਦੀਪ' ਤੇ ਤਿੱਖੀ ਹਨੇਰੀ,
ਯਕੀਨਨ ਆ ਬਚਾਵੋਗੇ ਕਿਸੇ ਦਿਨ।
deepzirvi9815524600
No comments:
Post a Comment